ថៃ៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានប្រកាសឱ្យឈប់ប្រកែកគ្នាពីរឿង «Muay Thai» និង «គុនខ្មែរ» ខណៈលោកអះអាងថាគ្មាននរណាម្នាក់យក «Muay Thai» ចេញពីថៃបានឡើយ។

លោកបានថ្លែងបែបនេះនៅក្នុងឱកាសលោកបានចូលរួមក្នុងកម្មវិធីផ្សព្វផ្សាយ និងលើកកម្ពស់ «ទិវា Muay Thai» នៅវិមានរដ្ឋាភិបាលថៃ នៅថ្ងៃអង្គារិ៍នេះ ដោយទិវា «Muay Thai» គ្រោងធ្វើឡើងនៅថ្ងៃទី០៦ ខែកុម្ភៈ ឆ្នាំ២០២៣ ខាងមុខនេះនៅឧទ្យាន Rajabhakti របស់ Hua Hin ។

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានថ្លែងដូច្នេះថា៖ «ថៃ មិនត្រូវប្រកែកតវ៉ាជាមួយនរណាឡើយ ព្រោះថា គ្មានអ្នកណាអាចដណ្ដើមយក «Muay Thai» ពីថៃបានឡើយ»។

លោក ប្រាយុទ្ធ ចាន់អូចា បានស្នើឱ្យស្ថាប័នពាក់ព័ន្ធនានាលើកកម្ពស់ Muay Thai ខណៈ Muay Thai ជាសិល្បៈក្បាច់គុនពិសេសមួយ និងជាវប្បធម៌ដ៏មានតម្លៃ។

ប្រទេសថៃបានកំណត់យកថ្ងៃទី០៦ ខែកុម្ភៈ ជាទិវា « Muay Thai» ចំពេលដែលព្រះបាទសានផេតទី ៨ ឡើងសោយរាជ្យ ដែលទ្រង់ត្រូវបានគេស្គាល់ថាជាអ្នកជំនាញ Muay Thai៕

^{PHOTO: THE NATION THAILAND}